എന്‍റെ സ്നേഹം..

എന്‍റെ സ്നേഹം എന്താണ് എന്ന് ഒരിക്കല്‍ നീ
എന്നോട് ചോദിക്കും..
അപ്പോള്‍ ഞാന്‍ പറയും !!!...

"നിന്‍റെ മനസ്സില്‍ ഞാന്‍ ഒളിപ്പിച്ചു വെച്ച എന്‍റെ മനസ്സാണെന്ന്..."

എന്നെ എനിക്ക് നഷ്ടമാകുന്നു..

എന്‍റെ വിശ്വാസത്തിനപ്പുറം നിനക്ക് നിന്‍റെതായ താഴ്വരകളും
തടാകങ്ങളും കലപില കൂട്ടുന്ന പക്ഷികളും വെളിച്ചവും ഉണ്ട്..
ഓരോ വസന്തങ്ങളും കാത്തിരുന്നു വെറുതെ ആകുമ്പോള്‍
ആരോ ഒരാള്‍ നിന്നോട് നിന്നെ കുറിച്ച് സംസാരിക്കും..
നീ എന്ന സത്യത്തെ..
ഞാന്‍ തിരിച്ചറിയാതെ പോയ കപടതയെ..

നീ എന്നില്‍ നിന്നും കട്ടെടുത്ത സ്നേഹത്തെ..
അതെന്‍റെ വിശ്വാസമായിരുന്നു..!
ഞാന്‍ കരുതിവെച്ച വസന്തം.
ഈ തണുപ്പ് കാലത്തില്‍ സിരകളോട് പിണങ്ങാതെ
നിണങ്ങള്‍ എനിക്ക് ചൂട് പകരുന്നു..
ഞാനറിയാതെ എന്നെ എനിക്ക് നഷ്ടമാകുന്നു..
ഇന്നലെകളില്‍ നമ്മള്‍,
ഇന്നില്‍ ഞാന്‍,
നാളെ നീ മാത്രം...

തിരിച്ചു കിട്ടാത്തൊരാ കളിചിരി ബാല്യം..

ഓര്‍മ്മകള്‍ കുറെ പുറകോട്ടു പോയപ്പോള്‍
നമ്മള്‍ പങ്കുവെച്ച ബാല്യവും കൗമാരവും
കലാലയ ഓര്‍മകളും മനസ്സില്‍ പതിഞ്ഞ പ്രണയങ്ങളും
എല്ലാം ഒരു ഗൃഹാതുരത്വം പോലെ മനസ്സിലെവിടെയോ
ഒരു വിങ്ങലായി അവശേഷിക്കുന്നു...

തിരിച്ചു കിട്ടാത്തൊരാ കളിചിരി ബാല്യവും
ഇനിയും മറവിക്ക് പിടികൊടുക്കാത്ത
കുറെ നല്ല ഓര്‍മകളും മാത്രം,
കൂട്ടായി എനിക്ക്...

ഈ രാത്രി...

1)

ഈ രാത്രി നിനക്കുള്ളതാണ്...
നിന്‍റെ സിരകളെ തണുപ്പിച്ച മരം കോച്ചുന്ന
തണുത്ത കാറ്റും നിന്‍റെ മാത്രമാണ്..
സ്നേഹമായി നിന്‍റെ മനസ്സിലേക്ക് ഞാന്‍ നീട്ടിയ നേര്‍ത്ത
അദൃശ്യ വരകളും നിന്‍റെ മാത്രം...

2)

ഈ രാത്രിയുടെ കറുപ്പില്‍ ആരുടെയൊക്കെയോ
സ്വപ്‌നങ്ങള്‍ ഉടയാതെ സൂക്ഷിച്ചിരിക്കുകയാണ്..
മനസ്സിലെപ്പോഴും നേര്‍ത്ത നൈര്‍മല്യം സമ്മാനിച്ച്‌
യാതൊന്നും പറയാതെ പോകുന്ന  സ്വപ്നങ്ങള്‍...

ഞാന്‍ അറിയുകയാണ്...

കാത്തിരിക്കാന്‍ മിഴി മടിച്ചപ്പോള്‍
മനസ്സ്‌ മിഴിയോട്പറഞ്ഞു !
നിന്‍റെ ഓരോ ഫ്രെയിമിലും
ഞാന്‍ അറിയുകയാണ്..

വഴിയോര പച്ചയില്‍
ആരെയോ പ്രതീക്ഷിച്ച
മനസ്സാണ് ഞാന്‍..

നിന്‍റെ മൗനം

ഞാന്‍ തിരയുന്നത്
നിന്‍റെ മൗനത്തെയല്ല,
അതില്‍ നീ ഒളിപ്പിച്ചു വെച്ച
ഞാന്‍ കേള്‍ക്കാന്‍ കൊതിച്ച
ആ വാക്കുകളെ ആണ്....

നനുത്ത ഒരു തുള്ളി..

ഓരോ മഴയും നിന്‍റെ മനസ്സിലേക്ക് പെയ്തിറങ്ങുമ്പോള്‍
മനസ്സ്‌ അറിയാതെ നനയും..
ആ നനവിലൊരു മഴത്തുള്ളി പൊടിയും..
നനുത്ത ഒരു തുള്ളി;
അതെന്‍റെ സ്നേഹമായിരുന്നു...

.........................

ചില മഴയുണ്ട്..
പൊട്ടിയ നൂലില്‍ സ്വാതന്ത്ര്യം കിട്ടിയ പട്ടം പോലെ..
ചരിഞ്ഞും തിരിഞ്ഞും, ചാറ്റലായും.. പേമാരിയായും
നമ്മളെ നനയിച്ചു പെയ്തിറങ്ങും..

സ്നേഹത്തിന്‍റെ മുറിപ്പാടാണ്...!!!

എന്നെ പിരിഞ്ഞുപോയവരൊക്കെ
ഒരിക്കല്‍ നഷ്ടബോധത്തോടെ എന്നെ ഓര്‍ക്കും...
അന്ന് അവരുടെ മനസ്സ് പിടഞ്ഞെങ്കില്‍...
മിഴി അറിയാതെ നനഞ്ഞെങ്കില്‍.!!!

അത് ഞാന്‍ അവര്‍ക്ക് നല്‍കിയ
സ്നേഹത്തിന്‍റെ മുറിപ്പാടാണ്...!

                               ---Shamnad Siberia...

ആ പഴയ കാലം...

മഴ പെയ്യുമ്പോള്‍ മനസ്സില്‍ നിറയെ ഓര്‍മകളാണ്....
കുട്ടിക്കാലത്ത് മഴയും നനഞ്ഞു നടവരമ്പത്തൂടെ
കളിച്ചു നടന്ന ആ പഴയ കാലം.
മഴ തോര്‍ന്നു കഴിയുമ്പോള്‍
കൂട്ടുകാരുമൊത്ത് വെള്ളത്തില്‍ കളിയ്ക്കാന്‍
ഇഷ്ടപ്പെട്ടിരുന്ന ബാല്യം...
വെള്ളത്തിലെ കളിയും കഴിഞ്ഞു
ആകെ നനഞ്ഞു ചെളിയും പുരണ്ടു വീട്ടിലെത്തി
തല്ലു വാങ്ങുന്നതിന്‍റെ ആ ബാല്യം....
മഴ പെയ്തു കഴിഞ്ഞു
മുറ്റത്തെ മാവിന്‍ ചുവട്ടില്‍ വീണു കിടക്കുന്ന
മാങ്ങയ്ക്കായി മത്സരിച്ച ആ പഴയ കാലം.
എന്തിനും മഴയായിരുന്നു കൂട്ട്....

                                        ---Shamnad Siberia...

മഴയില്‍ അലിയാന്‍...

"മഴ പിന്നെയും തോരാതെ
പെയ്തൊഴിഞ്ഞു കൊണ്ടിരുന്നു.....
മഴയില്‍ നനയാനും ഒടുവില്‍ മഴയില്‍ അലിഞ്ഞു
ഒരു മഴത്തുള്ളിയായി തീരുവാനും കൊതിച്ചു
ഞങ്ങള്‍ മഴയിലേക്കിറങ്ങി...."

ഞാന്‍ അറിഞ്ഞിരുന്നില്ല...

ആമി.....

അന്ന് അവസാനമായി നമ്മള്‍ കണ്ടു
മടങ്ങുമ്പോഴും ഞാന്‍ അറിഞ്ഞിരുന്നില്ല...
നീ എന്നെ വിട്ടു പിരിയുകയായിരുന്നുവെന്ന്.!!!

ചില ഇഷ്ടങ്ങള്‍!!!

"ചില  ഇഷ്ടങ്ങള്‍!!!
പരസ്പരം നമ്മളറിയാതെ പോകാറുണ്ട്"..
എനിക്ക് നിന്‍റെയും  നിനക്ക് എന്‍റെയും 
മനസ്സ് വായിക്കുവാന്‍ കഴിഞ്ഞിരുന്നുവെങ്കില്‍...!!!

നിന്നെക്കുറിച്ച്...

നിന്നെക്കുറിച്ച് എഴുതണം;
കൊതി തീരും വരെ നിന്നെ
എഴുതി കൊണ്ടേ ഇരിക്കണം...

നിന്‍റെ കണ്ണിലെ അഗ്നിയെ എനിക്ക്
വാക്കുകളില്‍ എരിയ്ക്കണം..
അതില്‍ എന്‍റെ മനസ്സും
നീ സമ്മാനിച്ച പ്രണയവും
ചാമ്പലാക്കണം...

------------------------------------------

നിന്നെക്കുറിച്ച് എഴുതണം;
കൊതി തീരും വരെ നിന്നെ
എഴുതി കൊണ്ടേ ഇരിക്കണം...

തൂലികത്തുമ്പിലെ മഷി കെടും വരെയും
ആത്മാവ് യാത്ര പറയും വരെയും...         

                        ---Shamnad Siberia...

യാത്ര ....

പാതി മുറിഞ്ഞു പോയ
ഒരു സ്വപ്നത്തിന്‍റെ ബാക്കിയും തേടിയുള്ള
യാത്രയിലാണ് ഞാനിപ്പോള്‍....
കണ്മുന്നില്‍ തെളിഞ്ഞ കുറച്ചു മുഖങ്ങള്‍ !!!
ഗൃഹാതുരത്വം നനയിച്ച മിഴികള്‍ !!!

ഓര്‍മ്മകള്‍ സ്വപ്നങ്ങളായി എന്നെ പഴയ
കാലത്തിലേക്ക് കൂട്ടിക്കൊണ്ടു പോയി..
ക്യാന്‍വാസില്‍ പതിഞ്ഞ ആ പഴയ
മുഖങ്ങളിലെവിടെയോ എന്‍റെ പ്രണയവും
പതിയിരിപ്പുണ്ടായിരുന്നു..

പാതി മുറിഞ്ഞു പോയ
ഒരു സ്വപ്നത്തിന്‍റെ ബാക്കിയും തേടിയുള്ള
യാത്രയിലാണ് ഞാനിപ്പോള്‍....
ഇന്ന് രാത്രിയിലും ഞാന്‍ ആ
സ്വപ്നത്തെ കാത്തിരിക്കുന്നു..
പാതി ബാക്കിയാക്കി മാഞ്ഞുപോയ
ആ സ്വപ്നത്തെ....

 

നന്ദി..!!!

പ്രണയത്തിന് മുഖം നല്കിയ അവള്‍ക്കും,
മിഴികള്‍ക്ക് വാക്കുകള്‍ നല്‍കിയ നാവിനും..
ഇന്നലെകള്‍ ക്യാന്‍വാസില്‍ പകര്‍ത്തിയ ഫ്രെയിമിനും..
മിഴിനീര്‍ മറച്ച മഴയ്ക്കും...
സൗഹൃദം എഴുതിയ സുഹൃത്തിനും..
എനിക്കായി കാത്തുനിന്ന മഴത്തുള്ളിക്കും..
നന്ദി..!!!

കാത്തിരുന്നു പെയ്ത മഴ..

"നനയാതിരിക്കാന്‍...
മഴത്തുള്ളിയില്‍ മുഖം ഒളിപ്പിക്കാതിരിക്കാന്‍
നിനക്ക് കഴിയുമോ??
കാത്തിരുന്നു പെയ്ത മഴയല്ലേ ഞാന്‍...."

നമ്മള്‍ ഒരു മഴയായി തീരും..

 "നിന്നില്‍ മഴയായി ഞാന്‍ ഇനിയും പെയ്യും...
നിന്നെ നനച്ചു നിന്‍റെ ആത്മാവിനെ എന്നോട് ചേര്‍ക്കും..
ഒടുവില്‍ നമ്മള്‍ ഒരു മഴയായി തീരും..
ഒരുമിച്ചു പെയ്യും.."

മനസ്സ്‌ പറയുന്നു..

കേട്ട് ശീലിച്ച വാക്കുകളും
കണ്ടു മറന്ന മുഖങ്ങളും
ഇന്ന് എന്‍റെ മുന്നില്‍
പുതുമ തേടുകയാണ്..
ഓരോ കാലഘട്ടത്തിലും
എനിക്ക് മനസ്സ് നിറയെ കിട്ടി,
പിന്നെ തരാന്‍ മറന്ന സ്നേഹവും..
കാലം തിരിച്ചെടുത്ത
കൊതി തീരാത്ത കുട്ടിക്കാലവും...
എന്‍റെ മനസ്സിനെ വല്ലാതെ നോവിക്കുന്നു..
പെയ്തു തോര്‍ന്നു പോയ മഴയില്‍
കുറെ ഓര്‍മകള്‍ ഒലിച്ചുപോയി...
മനസ്സില്‍ തോരാതെ പെയ്യുന്ന മഴ
മാത്രം കൂട്ടായുണ്ട് ഇപ്പോള്‍..
കുട്ടിക്കാലത്തെ ചില ഓര്‍മ്മകള്‍
ഇടയ്ക്കിടെ മനസ്സില്‍
വന്നു പോകാറുണ്ട്..
എന്തേ  അത് മാത്രം
മറവിക്ക് കൈമാറാതെ ഇനിയും ??
അറിയില്ല .!!!
അരികത്താരോ വരുമെന്നും
എന്‍റെ മനസ്സ് സ്വന്തമാക്കുമെന്നും
സ്നേഹം നിറഞ്ഞ ഒരു പുഞ്ചിരി
ഹൃദയത്തില്‍ നിറയ്ക്കുമെന്നും
ഞാന്‍ വിശ്വസിക്കുന്നു...
കാലം മാറിക്കൊണ്ടിരിക്കുന്നു..
കൂടെ ഞാനും നീയും..

ഷംനാദ് സൈബീരിയ...
 

അവള്‍ എന്‍റെ ലഹരിയാണ്..

നിഴലും നിലാവും ആയി അവള്‍
കൂടെ ഉള്ളപ്പോള്‍ ഞാന്‍ എന്നെത്തന്നെ
മറന്നു പോകുന്നു...
അറിയാതെ അവളിലലിഞ്ഞു പോകുന്നു...
എന്തെന്നാല്‍ അവള്‍ എന്‍റെ ലഹരിയാണ്...
മരണത്തിന്‍റെ കണ്ണുകള്‍ക്ക്‌ പോലും
തരാന്‍ കഴിയാത്ത ലഹരി..

ഓര്‍മപുസ്തകം..

 

 

ഓര്‍മപുസ്തകത്തിലെ പല താളുകളും
മങ്ങിയിരിക്കുന്നു...
ചിതലരിച്ച താളുകള്‍..
അതിലെ ഒരു താളില്‍ ആരോ സമ്മാനിച്ച്‌ പോയ
പ്രണയം ഞാന്‍ കണ്ടെടുത്തു..
പ്രണയ മഷി പടര്‍ന്ന വാക്കുകള്‍ക്ക്
ചുംബനത്തിന്‍റെ ലഹരി..
ആ ലഹരി കുടിക്കാന്‍ ഞാന്‍
ആ താളുകള്‍ ചുണ്ടോടു ചേര്‍ത്തു...
ലഹരി നുകര്‍ന്ന ചുണ്ടുകള്‍
സംസാരിച്ചത് നിന്നെക്കുറിച്ച് !!!
നീ തന്നുപോയ പ്രണയത്തെക്കുറിച്ച്..
എന്‍റെ ചുണ്ടുകള്‍ നിനക്ക് വേണ്ടി
സംസാരിച്ചു..
ഓരോ വാക്കുകളിലും ഞാന്‍
നിന്നെ പിന്നെയും അറിഞ്ഞു
തുടങ്ങുകയായിരുന്നു..

ഇന്നലെ നാം എപ്പോഴാണ് കണ്ടുമുട്ടിയത്..
ഇന്നലെകള്‍, പിന്നിട്ട കുറെ
വര്‍ഷങ്ങളുടെ കനം പേറിയിരുന്നു ..
എന്‍റെ ചുണ്ടുകള്‍ നിന്നെക്കുറിച്ച്
പറഞ്ഞു കഴിഞ്ഞപ്പോള്‍
ഞാന്‍ നിന്നെ അറിഞ്ഞു തുടങ്ങുകയായിരുന്നു..

ഓര്‍മപുസ്തകം പിന്നെയും കുറെ
താളുകള്‍ പുറകോട്ടു പോയി..
ക്യാംപസിന്‍റെ ഇടനാഴിയിലെവിടെയോ
ആദ്യമായി ഞാന്‍ നിന്നെ കണ്ടുമുട്ടിയതും
എന്‍റെ മിഴികള്‍ക്ക് പിടിതരാതെ
നീ കടന്നുപോയതും ഞാന്‍ ഓര്‍ക്കുന്നു..
പിന്നീട് പലപ്പോഴും നമ്മള്‍ കണ്ടുമുട്ടി,
ആദ്യം നമ്മള്‍ മിഴികള്‍ പങ്കുവെച്ചു..
പിന്നീട് മനസ്സ് പങ്കുവെച്ചു,
പിന്നെ സിരകളെ ചൂടാക്കിയ
ലഹരിയും...

നമ്മള്‍ പരസ്പരം സമ്മാനിച്ച
ചുംബനത്തിന്‍റെ ലഹരി ഞാന്‍
ഓര്‍മപുസ്തകത്തിന്‍റെ താളുകളില്‍ പകര്‍ത്തി..
നമ്മുടെ പ്രണയത്തിന്‍റെ ലഹരി..
എന്‍റെ നെഞ്ചിലെ ചൂടിന്‍റെ ലഹരി..

താളുകള്‍ മറിഞ്ഞു മറിഞ്ഞു പോയപ്പോള്‍
ഞാന്‍ നിന്നെയും നീ എന്നെയും മറന്നു..
നമ്മള്‍ മനപ്പൂര്‍വ്വം നമ്മളെ ചതിച്ചു..
സിരകളെ ചൂടാക്കിയ ലഹരി മാത്രം
നമ്മുടെ മനസ്സില്‍ അവശേഷിച്ചു..

മുറിഞ്ഞു പോയ ചിതലരിച്ച വാക്കുകളും
മഷി പടര്‍ന്ന പേജുകളും നിറഞ്ഞ
ഓര്‍മപുസ്തകം..
ഇനിയും തുറക്കാത്ത താളുകളും
പങ്കുവയ്ക്കാന്‍ ഓര്‍മകളും ബാക്കിയാക്കിയ
എന്‍റെ ഈ ഓര്‍മപുസ്തകം...

..::സൈബീരിയ::..

ഭ്രാന്തന്‍ ചിന്തകള്‍..

പ്രണയത്തിന്‍റെ നിഗൂഡതകള്‍ തേടിയുള്ള
അവന്‍റെ യാത്ര ചിന്തകളില്‍ നേരിയ ചലനം സൃഷ്ടിച്ചു..
ഇന്നലെകളില്‍ വരെ അവന്‍റെ മനസ്സിനെ സ്പര്‍ശിച്ച
അവള്‍, നാളേയും.!!!

"നിറഞ്ഞ സൗഹൃദം ഒരു മന്ദഹാസത്തില്‍ ഒതുക്കാന്‍
പരിശ്രമിച്ചവന്‍റെ വാക്കുകള്‍ ആരും ചെവിക്കൊണ്ടില്ല..
പക്ഷെ അവന്‍ മനസ്സിലാക്കി,
പ്രണയത്തിന്‍റെ പരിശുദ്ധത വിശ്വാസത്തിലാണെന്ന്.."

ഇവിടെ നഷ്ടങ്ങള്‍ അവനു മാത്രം...
പ്രണയം ആവോളം നുകര്‍ന്ന അവന്‍റെ മിഴികളില്‍ ഇപ്പോള്‍
ഒരു നിര്‍വികാരത മാത്രം!
മറ്റുള്ളവര്‍ക്ക് അവനൊരു ഭ്രാന്തന്‍ മാത്രം..
അവന്‍റെ ചിന്തകള്‍ക്ക് അഗ്നിയുടെ വീര്യം ഉണ്ട് എന്ന് 
ആരും തിരിച്ചറിയുന്നില്ല..
ഇരുണ്ട മുറിയില്‍ ചങ്ങലകളില്‍ ജീവിതം തുടരുന്ന
അവന്‍ ഇടയ്ക്കിടെ അലറിയിരുന്നു..
സ്വാതന്ത്രം ഇല്ലാത്തവന്‍റെ വേദന അവന്‍ പങ്കുവെക്കുകയായിരുന്നു..
സ്വാന്തനിപ്പിക്കാന്‍ ഒരിക്കല്‍ അവള്‍ തിരികെ വരുമെന്ന് അവന്‍
മനസ്സിനെ പറഞ്ഞു വിശ്വസിപ്പിച്ചിരിക്കണം, കാരണം
ഇടയ്ക്കിടെ അവന്‍ അറിയാതെ മന്ദഹസിക്കുമായിരുന്നു..

ഭ്രാന്തന്‍റെ വേഷം അവനു കല്‍പ്പിച്ചു നല്‍കിയ അവള്‍
പോലും അറിഞ്ഞിരിക്കില്ല അവന്‍റെ ആത്മാവ് ഒരിക്കലും
അവളെ വിട്ടുപിരിയില്ല എന്ന്...
ഒരിക്കല്‍ അവനു മനസ്സ് നഷ്ടപ്പെടും, ശരീരം നഷ്ടപ്പെടും
ആത്മാവ് മാത്രം അവളെ തേടിപ്പോകും....

വിശപ്പിന്‍റെ ബാല്യം..

വിശന്നു വലഞ്ഞു കരഞ്ഞ ബാല്യത്തിന്‍റെ
മിഴിനീര്‍ വറ്റിയ കണ്ണുകളില്‍
നിറഞ്ഞത് ചോരയുടെ നിറമായിരുന്നു..
ഒടുവില്‍ ആ ചോരയും വറ്റി..
ജീവന്‍ നിലച്ച ആ ബാല്യത്തെ
കാഴ്ചക്കാരായി ആരെക്കെയോ ഉറ്റുനോക്കി..
ആ കാഴ്ചകളില്‍ ഹൃദയം പൊട്ടുമായിരിക്കാം..
കണ്ണ് നിറയുമായിരിക്കാം ...
കാഴ്ചകള്‍ക്കിടയില്‍ നിന്നൊരു മിഴിനീര്‍
ബാല്യത്തിന്‍റെ ചുണ്ടുകള്‍ക്ക് ദാഹമകറ്റി..
ശവപ്പറമ്പിലെ ആത്മാക്കള്‍ക്ക് കൂട്ടായി
ഒരു ബാല്യവും കൂടി...


..::സൈബീരിയ::..

എന്‍റെ ലഹരി....

എഴുത്തിന്‍റെ ലഹരി തലയ്ക്കു പിടിച്ചപ്പോള്‍
നിന്‍റെ ഓര്‍മകളായിരുന്നു മനസ്സ്‌ നിറയെ.
ചിന്തകള്‍ക്കപ്പുറത്തെ ഒരു ലോകത്തില്‍
നിന്‍റെ സ്നേഹം ഞാന്‍ അറിയുന്നുണ്ടായിരുന്നു..
വാക്കുകള്‍ക്ക് കനം പിടിച്ച ചില നൊമ്പരങ്ങളും പേറി
തൂലികയുമായി ഞാന്‍...

പകല്‍ പക്ഷിയുടെ തേങ്ങലുകള്‍ വാക്കുകളായി
പകര്‍ത്തിക്കഴിഞ്ഞപ്പോള്‍ ബാക്കി വെച്ച നിന്‍റെ
ഓര്‍മകള്‍ക്ക് കൂട് തേടുകയായിരുന്നു ഞാന്‍..
അറിയാതെ മനസ്സില്‍ ഓടിയെത്തിയ ആ മിഴികള്‍,
ആ മിഴികളിലൂടെ നീ എന്നെ കാണുന്നുവെന്ന്
ഞാന്‍ കരുതി...
വളപ്പൊട്ടുകളുടെ സൗന്ദര്യത്തെ നിനക്ക് പകര്‍ന്നു നല്‍കിയ
മനസ്സിന്‍റെ ലഹരി ഇനിയും അവശേഷിക്കുന്നു.

തൂലിക പിന്നെയും വാക്കുകള്‍ തേടിപോയി...
നിനക്കായി മാത്രം ഞാന്‍ എഴുതാന്‍ ബാക്കിവെച്ച വാക്കുകള്‍...
ചുരത്തിയ മഷികള്‍ പറഞ്ഞത് എന്നിലെ നിന്നെക്കുറിച്ച്.
മഷി കെട്ടുപോയപ്പോള്‍ മുഴുമിപ്പിക്കാത്ത വാക്കുകളുമായി
എന്‍റെ ലഹരി ഇനിയും ബാക്കി...

..:: സൈബീരിയ ::..